મારા સુરતમાં રહેતા મિત્ર શ્રી ઉત્તમભાઈ ગજ્જરના આગ્રહને વશ થઈ મેં દાવડાના આંગણુંની ૧ ડિસેમ્બર ૨૦૧૬ના શરૂઆત કરી. ત્યારે મારી ઇચ્છા એને એક બ્લોગનું સ્વરૂપ આપવાની ન હતી. મારો વિચાર ૨૦૧૦ થી ૨૦૧૬ ની વચ્ચે મિત્રોને ઈ–મેઈલ દ્વારા મોકલેલા મારા લખાણ, જેમાંના મોટાભાગના આપોઆપ બ્લોગ–પોસ્ટ બની અલગ અલગ બ્લોગ્સમાં વિખરાયલા પડેલા હતા, તેમને એક જગ્યારે એકત્ર કરી સંગહી રાખવાનો હતો. આ નિર્ણયને અનુસરીને મેં અલગ અલગ ૧૬ ઈ–બુક્સ બનાવીને ‘દાવડાનું આંગણું’માં અપલોડ કરી.

માર્ચ ૨૦૧૭ સુધી બીજી કોઈ પ્રવૃતિ કરી નહીં. આ ચાર મહિનામાં માત્ર ૩૫૦૦ મુલાકાતીએ મુલાકાત લીધી, એમાનાં ૧૮૦૦ તો પ્રથમ મહિને કુતુહલવૃતિથી આવેલા. માર્ચ મહીનાની અધવચ્ચે મારા મિત્ર ડો. કનક રાવળ સાથે સલાહ કરી ૨૮મી માર્ચ ૨૦૧૭ થી કલાગુરૂ શ્રી રવિશંકર રાવળની સચિત્ર કથા અને એમના દોરેલા ચિત્રોનું વિવરણ રજૂ કરવાની શરૂઆત કરી. આ નવા વિભાગને લલિતકળા નામ આપ્યું. આ વિભાગમાં સતત ૫૫ પોસ્ટ મૂકી, અને આંગણું મહેમાનોથી મહેકવા માંડ્યું. આ વિભાગમાં શ્રી ખોડિદાસ પરમાર ના ચિત્રો અને એમનું વિવરણ ૧૪ અઠવાડિયા ચાલ્યું. ત્યારબાદ હોમાયબાનુની ફોટોગ્રાફીમાં પણ વાંચકોએ સારો રસ દર્શાવ્યો.

૩ જી જૂન ૨૦૧૭ ના ઉજાણી નામ આપીને વાંચકોની કૃતિઓ સ્વીકારવાની શરૂઆત કરી. ઉત્સાહભર્યો પ્રતિસાદ મળ્યો. અત્યાર સુધીમાં ૫૦ મિત્રોની કૃતિઓ આંગણાંમાં મૂકાઈ ચૂકી છે.

૧૭ મી જુલાઈ ૨૦૧૭ ના આંગણાંના સદનશીબે Bay Area ના જાણીતા લેખિકા અને કવિયત્રી જયશ્રી વિનુ મરચંટે, ધારાવાહી વિભાગની જવાબદારી સંભાળી અને પોતાના અનુભવો લખવાની શરૂઆત કરી. આંગણાંના મુલાકાતિઓની સંખ્યા વધવા લાગી. પ્રતિભાવો ઉપરથી લાગ્યું કે આંગણાંનું માન વધ્યું છે.

૨૯ મી સપ્ટેમ્બર ૨૦૧૭ ના ગુજરાતના સાક્ષર શ્રી બાબુભાઈ સુથારે આંગણાંમાં ઝરુખો વિભાગ શરૂ કરી, એમાં પોતાની આપવીતિ મૂકવાની શરૂ કરી. આંગણાંની પ્રતિષ્ઠા વધી. અમેરિકાના વધારે જાણીતા સર્જકો આંગણાંમાં રસ લેવા લાગ્યા. આશા છે કે આંગણું સ્વચ્છ, શિષ્ટ અને લોકભોગ્ય કલા અને સાહિત્ય રજૂ કરવામાં આગળ વધતું રહેશે.

એક વરસના ટુંકા ગાળામાં આંગણુંના વાંચકોની સંખ્યા ૧૭૦૦૦ સુધી પહોંચી  ગઈ. ૧૧૦૦ જેટલા પ્રતિભાવો આંગણાંમાં મૂકાયા. એટલા જ પ્રતિભાવો મને ઈ–મેઈલ દ્વારા મળ્યા. અહીં નમુના તરીકે મેં માત્ર ૧૨ પ્રતિભાવો જ રજૂ કર્યા છે.

(૧) દાવડા સાહેબના આંગણાંમાં જનારા દરેકને વિવિધતા ભરેલી વાનગીઓ ભોજનમાં મળશે! હું તો નિયમિત સભ્ય તરીકે સ્વાદિષ્ટ વાનગીઓનો આનંદ લઈશ.

ડો. દિનેશ ઓ. શાહ

(૨) દાવડા સાહેબ, આપના આંગણાંના ચબૂતરામં મોર, પોપટ, ચકલી, બુલબુલ બધા જુદા જુદા પક્ષીઓ ચણતાં ચણતાં આનંદ કરી રહ્યાં છે. હું પણ એક નાનું પક્ષી બની આનંદ લઈ રહી છું. આંગણાંમાં વીણી વીણીને દાણા નાખવા બદલ આભાર.

જીગીષા દિલીપ પટેલ

(૩) સાચ્ચે જ રળીયામણું આંગણું સજ્યું છે. નાના નાના લેખો અને માહીતીઓ વગેરે પ્રફુલ્લીલ ફુલો જેવાં લાગે છે. બધી જ સામગ્રી આંગણું નામને સાર્થક કરે છે. ખુબ આનંદ-સંતોષ સાથે ધન્યવાદ.

(૪) શ્રી દાવડાસાહેબ, હું રવિભાઈની પૌત્રી છું. મારા પિતા નરેન્દ્રભાઈ રવિભાઈના જ્યેષ્ઠ પુત્ર હતા. મારૂં મન આનંદ અને અન્ય પ્રકારની લાગણીઓથી ભરાઈ જાય છે, જ્યારે હું મારા બાપુ વિશે વાંચું છું, કે કેવી રીતે દુનિયા એમને અને કલાક્ષેત્રમાં એમના કાર્યને યાદ કરે છે, અને એમના સાહિત્યના ક્ષેત્રના અનુદાનને સંભારે છે. તમારા આંગણાંમાં આવીને મને આનંદ મળે છે. તમારી રચનામક પ્રવૃતિ વખાણવા લાયક છે. અમારા તરફથી હાર્દિક આવકાર ને આભાર, કારણ કે તમે મારા દાદાની યાદો સાચવી છે. હુ તમને તમારી સફળતા માટે શુભેચ્છા આપું છું. તમે સરસ શરૂઆત કરી છે. ઈશ્વર કરે દાવડાનું આંગણું સદા ફુલે-ફળે.

સાદર,

ઊર્મી રાવલ

(૫) આત્મિય દાવડાજી, આપનું સંશોધન, અને તેની નિર્દંભ, નિર્પેક્ષ અને નિર્ભય સહજ અને સરળ હૈયા ઉકલતભરી રજુઆત કરી, અને તેને આ રીતે સંકલન કરી, “દાવડાનું આંગણું.” રૂપે સમાજને સમર્પણ દ્વારા, એક સાત્વિક માર્ગ-દર્શક પુરો પાડ્યો છે. સર્વ શુભેચ્છા સહ હાર્દિક અભિનંદન.

ધીરજલાલ વૈદ્ય

(૬) દાવડાજી, આપના આંગણામાં પરબ છે, ભજનની અને જ્ઞાનની લ્હાણી છે. અમારા જેવા લોકો આવી, લાભ લઇ, બંને હાથ ઊંચા કરી ધન્યવાદની લાગણી બતાવી જતા રહેતા હોય છે. આવી જગ્યાએ હાજરી પત્રક અથવા વિઝીટર બુકની શી જરૂર? આપનાધ્યેયસૂત્ર મુજબ રામ નામ લિયે જા આપના કામ કિયે જા ઉત્તમ માર્ગ દર્શક છે.

કેપ્ટન નરેન્દ્ર

(૭) વડીલ શ્રી,

આપનો બ્લોગ સડસડાટ ઊંચાઈ પર પહોંચી રહ્યો છે. લાંબા સમય પછી મેં બ્લોગની મુલાકાત લીધી. થોડું વાંચ્યું. ઘણું બાકી છે. એક આખો દિવસ બ્લોગ પર ગાળવો પડશે. તો યે પુરું તો ન જ થાય. તમે રિચર્ચ પાછળ ખૂબ જ પરિશ્રમ કર્યો છે. મિત્રો ચોક્કસ લાભ ઉઠાવશે જ.

પ્રવીણ શાસ્ત્રીના સાદર વંદન

(૮) દાવડાસાહેબ, ખૂબ ખૂબ આભાર. ખોડીદાસભાઈ જેવા કલાકારનો પરિચય કરાવી એમની કૃતિઓ માણવાનો અવસર આપવા બદલ. હું ધન્ય થઈ ગયો. એકે એક કૃતિ અણમોલ છે. અભિનંદન. તમને અને કલાકારને.

હરનીશ જાની

(૯) તમારૂં સંકલન એ અન્ય બ્લોગ્સના તંત્રીઓ માટે ઉદાહરણરૂપ છે. તમે મારા પિતાના જીવન અને કાર્યને માન આપ્યું છે. તમે આ સંકલન માટે જે સમય આપ્યો છે, એના માટે હું હ્રદય પૂર્વક આભાર વ્યકત કરું છું.

સસ્નેહ,

ડો. કનક રાવળ

(૧૦) ભાઈ, મને તમારૂં લખાણ ગમે છે. આદરણીય શ્રી મહેન્દ્રભાઈ મેઘાણી પછી, તમારી કાર્ય શૈલીમાં, કોઈ પણ રચનાનું તાત્પર્ય કાઢી, કલાકારની જેમ ટુંકાણમાં અને ચોકસાઈથી રજૂ કરવાની શક્તિનો પરિચય થાય છે. હું પણ તમારી જેમ લખી શકતી હોત તો કેવું સારૂં?

જયશ્રી વિનુ મરચંટ

(૧૧) મુ. દાવડા સાહેબ, આને કહેવાય ચરિત્ર લેખ. સાહિત્યકારોએ આમાંથી ઘણું શીખવાનુ છે. તમે મુદ્દાસર લખીને એક વ્યક્તિ ચિત્ર ઉપજાવ્યું છે.. લોકોના માંગીને લાવેલા લેખને ઊંચા મૂકી. આપના આવા પ્રસંગો લખવા માંડો તો આપના અનુભવોનો વિપુલ ખજાનાનો લાભ અમને મળે.ધન્યવાદ.

હરનીશ જાની

(૧૨) વહાલા દાવડાભાઈ, તમારો બ્લોગ માત્ર સાહિત્ય માટે રત્નોની ખાણ નથી પણ એમાંથી કલાના રત્નો પણ મળે છે. તમે જે દુર્લભ ચિત્રો રજૂ કર્યા છે એ મેં અગાઉ કોઈ ફાઈન આર્ટના સામયિકમાં પણ જોયા નથી. તમારો બ્લોગ સાહિત્ય અને કલા પૂરી પાડતો એક ઉત્તમ શ્રોત છે.

ડો. દિનેશ ઓ. શાહ

આશા છે, વાંચકોનો આવો જ પ્રેમ આંગણાંને હંમેશાં મળતો રહેશે. ડીસેમ્બર ૨૦૧૭ થી શ્રી નટવર ગાંધી અને શ્રી કિશોર દેસાઈની કલમોની પ્રસાદી આંગણાંને મળશે.

–પી. કે. દાવડા